एचपिभी खोप अभियान सुरु: तनहुँमा १४ हजार र देशभर १७ लाखले खोप लगाउने

दमौली/विश्व क्यान्सर दिवसको अवसर पारेर सरकारले पाठेघरको मुखको क्यान्सर विरुद्धको खोप अभियान प्रारम्भ गरेको छ ।
मंगलबार माघ २२ मा प्रारम्भ भएको अभियानका क्रममा विद्यालयमा कक्षा ६ देखि १० सम्म पढ्ने किशोरी तथा विद्यालय बाहिर रहेका १०–१४ उमेर समूहका किशोरीले एचपिभी खोप लगाउने छन् । तनहुँका करिब १४ हजार २ सय ७८ किशोरीले यो खोप लगाउने छन् भने देशभरका १६ लाख ८८ हजार सात सय ६८ जना किशोरीलाई खोप दिइने लक्ष्य सरकारले राखेको छ ।

सरकारी तथ्याङ्क अनुसार एचपिभी खोप लगाउने किशोरीको संख्या सबैभन्दा धेरै मधेश प्रदेशमा ४ लाख ७ हजार २९१ रहेको छ भने सबैभन्दा थोरै गण्डकी प्रदेशमा १ लाख १८ हजार ७७४ रहको छ । यसैगरी सुदूरपश्चिम प्रदेशका २ लाख १ हजार १३४, कर्णालीका १ लाख २८ हजार २९६, लुम्बिनीका २ लाख ९९ हजार ४७१, बागमतीका २ लाख ७३ हजार १२१ तथा कोशीका २ लाख ५९ हजार ८८१ किशोरी लाई यो खोप लगाउने कार्यक्रम रहेको छ ।
फागुन ६ सम्म देशभर एकै पटक सञ्चालन हुने खोप अभियानका क्रममा लगाइने यो खोपले किशोरीहरुलाई पाठेघरको मुखको क्यान्सरको जोखिमबाट जोगाउँछ । नेपालमा महिलाहरूमा हुने क्यान्सरमध्ये पाठेघरको मुखको क्यान्सर पहिलो स्थानमा रहेको
छ । यसको संक्रमणबाट एचपिभी (ह्युमन प्यापिलोमा भाइरस) कारण हुने उक्त क्यान्सरबाट जोगाउन यो खोप दिन लागिएको हो ।
खोप अभियानमा देशभर १८ हजार नौ सय विद्यालयका खोप केन्द्र र आठ हजार दुई सय अन्य खोप केन्द्र रहने छन् । २७ हजार ८० स्वास्थ्यकर्मी परिचालन हुने यो अभियानमा ५४ हजार एक सय ६० स्वयंसेवक खटाइएका छन् ।
तनहुँमा भोली २५ गते सकिने पहिलो चरण अन्तर्गत कार्यतालिका बनाएर तोकिएको उमेर समूहका भानु, व्यास, देवघाट, बन्दिपुर, आँबुखैरेनीका किशोरीलाई खोप लगाइएको छ । यसैगरी माघ २७ देखि ३० सम्मको दोस्रो चरणमा ऋषिङ, घिरिङ, म्याग्दे, भिमाद र शुक्ला गण्डकीमा खोप अभियान सञ्चालन हुनेछ ।
अभियान सञ्चालनका लागि तनहुँमा २ सय ५९ खोप केन्द्र रहेका छन् । बायाँ पाखुराको माथिल्लो भागमा लगाउने यो खोप लगाएपछि केही सामान्य असर देखिएपनि त्यसले समस्या नल्याउने बताइएको छ ।