
विशेषसम्वाददाता
आगामी २५ फागुनमा हुने राष्ट्रपति निर्वाचनका लागि पूर्वसभामुखद्वय रामचन्द्र पौडेल र सुवासचन्द्र नेम्वाङको उम्मेदवारी परेको छ । पौडेललाई आठदलीय गठबन्धनको समर्थन छ भने नेम्वाङ एमालेका एकल उम्मेदवार हुन् ।
शनिबार १२.४५ बजे उम्मेदबारी दर्ता गरेका एमाले उपाध्यक्ष नेम्बाङको प्रस्तावकमा एमाले अध्यक्ष खड्गप्रसाद शर्मा ओली, पृथ्वीसुब्बा गुरुङ, गोकर्ण विष्ट, रघुबीर महासेठ र छविलाल विक रहेका छन् । यसैगरी समर्थकहरुमा योगेश भट्टराई, टोपबहादुर रायमाझी, जुलीकुमारी महतो महासेठ, दिलकुमारी रावल थापा र अमनकुमार मास्के रहेका छन् ।
अर्का उम्मेदबार कांग्रेस वरिष्ठ नेता पौडेलको प्रस्तावकमा सभापति शेरबहादुर देउवा, एकीकृत समाजवादीका अध्यक्ष माधव नेपाल, माओवादी वरिष्ठ उपाध्यक्ष नारायणकाजी श्रेष्ठ, जसपा सांसद अशोक राई र जनमतका सांसद अब्दुल खान रहेका छन् । यसैगरी समर्थकमा लोसपा अध्यक्ष महन्थ ठाकुर, कांग्रेस उपसभापति पूर्णबहादुर खड्का, नागरिक उन्मुक्तिकी अध्यक्ष रञ्जिता श्रेष्ठ, जनमोर्चा अध्यक्ष चित्रबहादुर केसी र माओवादी प्रमुख सचेतक हितराज पाण्डे छन् ।
उम्मेदवारी दर्तासंगै पौडेलले एमालले पनि आफुलाई सघाउने र आफु राष्ट्रपतिको सर्वसम्मत उम्मेदवार हुने अपेक्षा रहेको बताउँदै नेपालको संविधानको अक्षर र भावनालाई अक्षरशः पालना गर्ने, संघीय लोकतान्त्रिक गणतन्त्रको सपना सकार गर्ने र गणतन्त्रलाई संस्थागत गर्न भूमिका खेल्ने उल्लेख गरे । एमाले उम्मेदबार नेम्बाङले आफु हिजो संविधानसभामा ३१ दलको निर्विकल्प सर्वसम्मत संविधानसभाको अध्यक्ष भएर काम गरेको उल्लेख गर्दे त्यही संविधानको संरक्षक हुने अवसर आफुलाई प्राप्त हुने विश्वास व्यक्त गरे ।
नेपालको संविधानको धारा ६२ उपधारा १ बमोजिम राष्ट्रपतिको निर्वाचन संघीय संसदका सदस्य र प्रदेश सभाका सदस्य मतदाता रहेको निर्वाचक मण्डलबाट हुनेछ । संघीय संसदका सदस्यको मतभार र प्रदेश सभाका सदस्यको मतभार संघीय कानुनमा व्यवस्था भए अनुसार हुने संविधानमा उल्लेख छ । यो व्यवस्था अनुसार संघीय संसद्का, २७२ प्रतिनिधिसभाका र ५९ राष्ट्रिय सभाका गरी ३३१ तथा प्रदेश सभाका ५५० सांसद राष्ट्रपति निर्वाचनमा मतदाता छन् । जनसंख्याको आकारलाई आधार मानेर तय गरिने मतभार संघीय सांसदको ७९ र प्रदेश सांसदको ४८ रहेको छ ।
कुल मतभार ५२ हजार ६२८ रहेकोमा जसपाकी सांसद सहनाज रहमानको मृत्य भएसंगै कायम हुन आएको मतभार ५२ हजार ५४९ मध्ये जितका लागि कम्तीमा २६ हजार २७५ मत ल्याउनुपर्छ । पौडेलको पक्षमा देखिएको आठदलीय गठबन्धनको प्रतिनिधिसभामा १५६ र राष्ट्रिय सभामा ४० तथा प्रदेश सभामा ३४८ सांसद छन् । उनीहरुको कूल मतभार ३२ हजार १८८ हुन
आउँछ । एमाले उम्मेदबार नेम्बाङको पक्षमा भने हालसम्म आफ्नै दलका प्रतिनिधिसभाका ७९ र राष्ट्रिय सभाका १८ सांसद तथा प्रदेश सभामा १६१ सांसद मात्र छन् । उनले प्राप्त गर्ने मतभार १५ हजार ३९१ रहेको छ ।
रात रहे अग्राख पलाउँछ भन्ने नेपाली उखान चरितार्थ नभए आठ दलका साझा उम्मेदबार कांग्रेस वरिष्ठ नेता रामचन्द्र पौडेल ६१.२५ प्रतिशत मत सहित राष्ट्रपतिमा निर्वाचित हुनेछन् । यसो भएमा तनहुँले आफ्ना जनप्रतिनिधिलाई देशको सर्वोच्च पद राष्टपतिको रुपमा पाउने छ ।
तर महिना नपुग्दै बन्ने नयाँ नयाँ गठबन्धनका कारण मतदान हुने दिन फागुन २५ सम्म के हुन्छ भन्न नसकिने भएकाले पौडेल ढुक्क भईहाल्ने र तनहुँवासी खुसी भैहाल्ने स्थिती भने छैन ।