नेपाली कांग्रेसको चौधौं महाधिवेशनको पाचौं पटक कार्यतालिका प्रकाशन भएको छ । नेपाली कांग्रेस केन्द्रीय निर्वाचन समितिको कार्तिक ११ मा सम्पन्न बैठकले बाँकी रहेका डोल्पा, बाँके, कैलाली लगाएत १२ जिल्लाका नगर र गाउँका वडा अधिवेशन कार्तिक २७ बाट प्रारम्भ गरी केन्द्रीय महाधिवेशन मंसिर २४,२५ र २६ काठमाण्डौंमा गर्नेगरी पाँचौं पटक कार्यतालिका प्रकाशन गरेको हो ।
पछिल्लो पटक प्रकाशित कार्यतालिका अनुसार तनहुँ जिल्लाको प्रदेश सभा क्षेत्रीय अधिवेशन मंसिर ३ मा हुनेछ भने प्रतिनिधि सभा क्षेत्रीय अधिवेशन मंसिर ७ मा र जिल्ला अधिवेशन मंसिर १० मा हुनेछ ।
२०७६ फागुनमा हुनुपर्ने महाधिवेशन एक वर्षपछि २०७७ फागुनका लागि तोकियो तर हुन सकेन । २०७८ भदौमा गर्ने भनि दुइ फरक मितिका लागि कार्यतालिका सार्वजनिक भयो तर ति मितिहरुमा पनि महाधिवेशन हुन सकेन । फेरी मंसिरका लागि तोकिएको महाधिवेशन उक्त मितिमा पनि नहुने भएको छ र मंसिर अन्तिम साता गर्नेगरी कार्यतालिका प्रकाशन भएको छ ।
बारम्बार कार्यतालिका परिवर्तन गर्दै वस्दै गर्दा कांग्रेसको विश्वासनियतामा ह्रास आउने चिन्ता आम कांग्रेसजनमा छ । यसले निर्वाचनका बेला नकारात्मक परिणामका लागि बल पुग्ने उनीहरुको चिन्ता हो । यो स्वाभाविक चिन्ता पनि हो किनभने यसले कांग्रेस आफुले भनेको काम समयमा गर्दैन भन्ने बुझाई आम मतदातामा बन्न सक्छ । अझ वाकपटु प्रतिपक्षी दलका नेता केपी ओलीले कांग्रेस महाधिवेशन गर्न नसक्नेगरी बुढो भएको भनेर गर्न थालेको प्रचारले थप गलत बुझाई बन्न सक्छ । त्यस माथि मंसिरसम्ममा महाधिवेशन नगर्दा कांग्रेसको संवैधानिक हैसियत गुम्ने र आगामी निर्वाचनहरुमा भाग लिन नपाउने अवस्था आउने भन्ने कतिपय कानून व्यवसायीको तर्कले आमकांग्रेस जनमा चिन्ताको बादल मडारिएको छ ।
यी सबै कुराको मनन गर्दै नेतृत्वले आ–आफ्ना दाउपेच भुलेर पछिल्लो पटक निर्धारित मितिमा चौधौं महाधिवेशन सम्पन्न गरोस् र आम कार्यकर्ता र शुभचिन्तकको चिन्ता निवारण गरोस् साथै पार्टीलाई पुनर्जीवन प्रदान गरोस् ।
