Tanahu Awaj - Tanahun Awaj

दमौली/नेपाल बार एशोसिएशन तनहुँ बार इकाईको २१औं अधिवेशनको मिति २०८२ जेठ २ गतेका लागि तोकिएको छ । तनहुँ बारसंग आबद्ध तीन बरिष्ठ अधिवक्ताहरुलाई सम्मान गर्दै जिल्ला न्यायाधीश कमलराज विष्टको प्रमुख आतिथ्यतामा गर्न लागेको २१औं अधिवेशनले आगामि दुई बर्षका लागि १३ सदस्यीय नयाँ कार्य समितिको चयन गर्नेछ ।
२१औं अधिवेशनका लागि प्रजातन्त्रवादी समूहबाट एक र प्रगतिशिल समूहबाट एक÷एक जनाले इच्छा जाहेर गर्ने तर अन्त्यमा गएर सर्वसम्मत गराउँदै अगाडि बढेको तनहुँ बारको विगत रहेको छ । विशेष गरी अग्रजहरुले लाइसेन्समा ज्येष्ठता, पेशामा निरन्तरतालाइ प्रमुख आधार बनाएर सर्वसम्मत नेतृत्व चयन गर्ने विगतदेखिको प्रचलन रहेको छ । यसपटक पनि अन्त्यमा हुने त्यही हो भन्छन्–सम्बद्ध कानुन व्यवसायीहरु । यस पटक तनहुँ बारको नेतृत्व प्रजातन्त्रवादी समूहको भागमा परेको हुँदा डेमोक्रेटिक लयर्स एशोसिशन तनहुँमा आबद्ध सदस्यहरुबाट अध्यक्षको आकाँक्षीहरुको संख्या धेरै रहेको छ ।
डेमोक्रेटिक लयर्स एशोसिशन तनहुँबाट पाँच जना आकाँक्षीहरुका बीच सहमति जुटाउन डिएलएले पटक पटक प्रयास गरेको बताईन्छ । तर स्वमूल्याङ्कनबाट पालो पर्खन भन्दा डिएलएका पूर्वअध्यक्षहरु सहितको कार्यसमितिले गरेको निर्णयलाई मान्ने प्रतिबद्धता जाहेर गरेपछि डिएलएको तर्फको उम्मेदवार यथासमयमा सार्वजनिक गर्ने वैधानिक प्रक्रिया पुरा गरेको डिएलए तनहुँका अध्यक्ष रविन्द्र बाराकोटीले बताउनु भयो ।
अगामि दुई बर्ष तनहुँ बारको नेतृत्व लिन आकाँक्षीहरुमा कृष्णहरि वाग्ले लाईसेन्समा ज्येष्ठता र पेशागत निरन्तरता भएका उम्मेदवार हुन् । त्यसैगरी अहिलेसम्म एक मात्र महिला अध्यक्ष भएको तनहुँ बारको इतिहासमा अध्यक्ष हुन योग्यता पुगेको आकाँक्षी सरिता थापा भण्डारी हुन् । बाँकी तीन जना आकाँक्षीहरुमा शिबराज काफ्ले, शरणहरि पन्थ र हरिमान श्रेष्ठ रहेका छन् । यी आकाँक्षीहरुबाट एक उम्मेदवार चयन गर्न अख्तियार पाएको डिएलए अग्रज सहितको कार्यसमितिले मुख्यतः कृष्णहरि वाग्ले र सरीता थापा भण्डारी बीचबाट नेतृत्व चयन गर्ने मानसिकतामा रहेको पाईन्छ । त्यो व्यक्ति किटान भने निर्णय सार्वजनिक भएपछि नै आधिकारिक रुपमा थाहा हुने विषय हो । तर पाँचै जना तनहुँ बारको नेतृत्व सम्हाल्नका लागि कार्यसमितिको अध्यक्ष बाहेकका पदमा बसेर काम गरी अनुभव हासिल गरिसकेका योग्य र सक्षम उम्मेदवारहरु हुन् ।
तनहुँ बारको अधिवेशनमा प्रगतिशिल समूहको तर्फबाट पनि उम्मेदवारी पर्न सक्ने अवस्था छ । तर डिएलएको सर्वसम्मत बनाउने टिमले थप प्रयास गर्न सक्यो भने प्रगतिशिल समूह समेतबाट एकैचोटी सर्वसम्मत नेतृत्व चयन गर्न सक्ने संभावनालाई नकार्न सकिदैन । प्रगतिशिल समूहबाट अहिले अध्यक्षको दावी गर्न सक्ने आकाँक्षीहरुमा त्रिभुवन श्रेष्ठ, हरिश्चन्द्र वाग्ले, इन्द्रा थापा र विष्णुभक्त सिग्देल रहेका छन् ।