Tanahu Awaj

फागुन–२१ मा हुने प्रतिनिधि सभा निर्वाचनका लागि तनहुँ क्षेत्र नं १ बाट दलका १३ र स्वतन्त्र ३ गरी १६ जनाले मनोनयन दर्ता गरेका छन् । तनहुँ आवाजले मतदातालाई योग्य प्रतिनिधि छान्न र मतदान गर्न सजिलो होस् भनेर उम्मेदवारका बारेमा नागरिकले जान्नु पर्ने कुराहरु प्रस्तुत गर्ने जमर्काे गरेको छ । यस पटक श्रम संस्कृति पार्टी, नेशनल रिपब्लकि नेपाल, आम जनता पार्टी तथा दुइ स्वतन्त्र उम्मेदबारका बारेमा संक्षिप्त जानकारी लिएर आएका छौं । –तनहुँ आवाज साप्ताहिक

श्रमको सम्मानका समर्थक गुरुङ

आगामी फागुन २१ मा हुने प्रतिनिधि सभा सदस्य निर्वाचनका लागि तनहुँ निर्वाचन क्षेत्र नं. १ बाट उम्मेदवार बनेका आँबुखैरेनी गापा ३ पानीघट्टका ४१ वर्षिय काशीराम गुरूङ अहिले स्थानीय राजनीतिमा चर्चाको पात्र बनेका छन् ।

यसअघि राष्ट्रपति रामचन्द्र पौडेल र डा. स्वर्णिम वाग्ले जस्ता हस्तीहरू निर्वाचित भइसकेका यो क्षेत्रमा धरान उपमहानगरपालिकाका मेयर हर्क साम्पाङको नेतृत्वमा स्थापना भएको नयाँ राजनीतिक दल श्रम संस्कृति पार्टीबाट गुरुङ उम्मेदवार बनेका हुन् । गुरुङले ‘हर्कवाद’ श्रमको सम्मान, प्रकृति संरक्षण र स्वावलम्बनलाई आफ्नो मूल मन्त्र मानेका छन् ।
‘श्रम गर्नेलाई सम्मान र उत्पादनमुखी राजनीति’ भन्ने नाराका साथ मतदाताहरूसँग मत मागिरहेका गुरुङले निर्वाचन अभियानमा स्थानीय स्रोत र साधनको परिचालन, पारदर्शी शासन र विकासमा जनश्रमदान जस्ता विषयहरू प्राथमिकतामा राखेका छन् ।
परम्परागत शक्तिहरू, नेपाली कांग्रेस र एमाले र नयाँ शक्तिका रूपमा उदाएको रास्वपाका विरुद्ध श्रम संस्कृति पार्टीको तर्फबाट काशीराम गुरूको उम्मेदवारीलाई एक ‘वैकल्पिक धार’ को रूपमा हेरिएको छ । विशेषगरी हर्क साम्पाङको श्रम अभियानबाट प्रभावित युवा र श्रमजीवी वर्ग गुरुङको मुख्य मतदाता हुन् ।

किसान र श्रमिक हक खोज्दै चिजामाया

आगामी फागुन २१ मा हुने प्रतिनिधि सभा सदस्य निर्वाचनका लागि तनहुँ निर्वाचन क्षेत्र नं. १ बाट उम्मेदवारी दिएकी भानु नपा १२ की ४३ वर्षिय चिजामायाँ अधिकारी प्रभु साह नेतृत्वको आम जनता पार्टी (आजपा) को तर्फबाट उम्मेदवार बनेकी हुन् ।

स्थानीयस्तरमा एक सामाजिक र राजनीतिक कार्यकर्ताका रूपमा परिचित अधिकारी यस क्षेत्रबाट उम्मेदवारी दिने तीन जना महिलाहरूमध्ये एक हुन् ।
आम जनता पार्टीको उम्मेदवारका रूपमा उनले मुख्यतया निम्न विषयहरूलाई अघि सारेकी छन् ।
यसैगरी आम जनताको अधिकार सुनिश्चित गर्न र भ्रष्टाचारमुक्त समाज निर्माण गर्ने, कृषि क्षेत्रमा देखिएका समस्या समाधान र श्रमजीवी वर्गको उत्थानउनका मुख्य मुद्दा हुन् ।

खनालको एजेण्डा राजनीतिक सुधार

आगामी फागुन २१ मा हुने प्रतिनिधि सभा सदस्य निर्वाचनका लागि तनहुँ निर्वाचन क्षेत्र नं. १ बाट भानु नपा ४ ढकालटारका ६५ वर्षिय लेखनाथ खनालले स्वतन्त्र उम्मेदवारका रूपमा आफ्नो मनोनयन दर्ता गराएका छन् ।
पुराना दलहरू र नयाँ शक्तिहरूप्रतिको असन्तुष्टिका बीच लेखनाथ खनाल जस्ता स्वतन्त्र उम्मेदवारहरूले आफूलाई ’वैकल्पिक पात्र’ का रूपमा प्रस्तुत गरिरहेका छन् ।
स्वतन्त्र उम्मेदवारका रुपमा खनालले स्थानीय मुद्दाहरू, सुशासन र परम्परागत राजनीतिको सुधारलाई आफ्नो मुख्य एजेन्डा बनाएका छन् ।

युवा नेतृत्वको वकालत गर्दै सुमन

आगामी फागुन २१ मा हुने प्रतिनिधि सभा निर्वाचनका लागि तनहुँ निर्वाचन क्षेत्र नं. १ बाट नेशनल रिपब्लिक नेपाल को तर्फबाट शुक्लागण्डकी नपा १ का ४१ वर्षिय सुमन थापा मगरले उम्मेदवारी दिएका छन् ।
यस क्षेत्रमा मुख्य दलहरू नेपाली कांग्रेस, नेकपा एमाले, रास्वपा बाहेक अन्य साना दलहरूले पनि आफ्नो उपस्थिति बलियो बनाउन खोजिरहेका छन्, जसमा सुमन थापा मगर पनि एक हुन् ।

मगर मुलुकको गणतन्त्रात्मक व्यवस्थालाई थप सुदृढ र जनमुखी बनाउनुपर्ने वकालतगर्छन् । मगरले पुराना र स्थापित दलहरूको कार्यशैलीप्रति असन्तुष्टि जनाउँदै नयाँ विकल्पको रूपमा आफूलाई प्रस्तुत गरिरहेका छन् ।
स्थानीय स्रोत–साधनको समुचित प्रयोग, भ्रष्टाचारको अन्त्य र पारदर्शी राजनीतिको मुद्दा उनको चुनावी अभियानको मुख्य हिस्सा रहेको पाइन्छ ।
तनहुँ १ मा यसअघि भएका निर्वाचनहरूले नयाँ र वैकल्पिक शक्तिहरूलाई अनुमोदन गरेको इतिहास रहेकाले, सुमन थापा मगर र उनको दलले पनि स्थानीयस्तरमा युवा र परिवर्तनका पक्षधर मतदाताहरूको ध्यान तान्ने प्रयास गरिरहेको छ ।
उनले विशेषगरी युवा स्वरोजगार र कृषिमा आधारित उद्योगहरूको विकासलाई आफ्नो प्राथमिक प्रतिवद्धता बनाएका छन् ।

युवा आवाजको प्रतिनिधि सन्देश

आगामी प्रतिनिधि सभा सदस्य निर्वाचनका लागि तनहुँ निर्वाचन क्षेत्र नं. १ बाट स्वतन्त्र उम्मेदवारी दिने अर्का व्यक्ति व्यास नपा ३ का २९ वर्षिय युवा सन्देश रानाभाट लौडारीले हुन् ।

पछिल्लो समय स्थापित राजनीतिक दलहरूप्रति मतदाताहरूको असन्तुष्टि र “वैकल्पिक उम्मेदवार“ खोज्ने प्रवृत्ति देखिएको छ । सन्देश रानाभाट लौडारीको उम्मेदवारीलाई पनि यही परिवर्तनको चाहना र स्वतन्त्र आवाजको प्रतिनिधित्वका रूपमा हेरिएको छ । रानाभाटले विशेष गरी स्थानीय मुद्दाहरू र युवाहरूको भावनालाई सम्बोधन गर्ने अपेक्षा गरिएको छ ।
यो क्षेत्रमा नेपाली कांग्रेसका गोविन्द भट्टराई, रास्वपाका डा. स्वर्णिम वाग्ले र नेकपा एमालेकी भगवती न्यौपाने जस्ता ’हेभीवेट’ उम्मेदवारहरू रहेकाले सन्देश रानाभाट लौडारी जस्ता स्वतन्त्र उम्मेदवारहरूले कति मत काट्छन् वा कस्तो प्रभाव पार्छन् भन्ने विषयलाई अर्थपूर्ण रूपमा हेरिएको छ ।