महायज्ञको सफलताको कामना

अप्सरा भट्टराई
व्यास–१ गल्बुवेसी

श्रीकृष्ण द्वैपायन व्यासको १०८ फुट अग्लो मुर्ती बनाउने उद्देश्यले दमौलीमा सोमबारबाट श्रीमद्भागवत सप्ताह विराट ज्ञान महायज्ञ प्रारम्भ भएको छ । चार वेद तथा अठार पुराणका रचयिता व्यासको सम्मान साथै यस क्षेत्रलाई धार्मिक पर्यटकिय क्षेत्रको रुपमा विकास गर्ने उद्देश्यले उक्त मुर्ती निर्माण गर्न लागिएको र सोका लागि आवश्यक रकम जुटाउने हेतुले महायज्ञको आयोजना गरिएको हो ।

यो क्षेत्रलाई धार्मिक पर्यटकिय क्षेत्रको रुपमा विकास गर्नका लागि डिपिआर समेत तयार भएको र सो अनुसारको संरचना निर्माण गर्न झण्डै ६४ कारोड लाग्ने अनुमान गरिएको छ । पर्यटन तथा नागरिक उड्डयन मन्त्री योगेश भट्टराईले महायज्ञको उद्घाटन गर्दै यस क्षेत्रलाई धार्मिक पर्यटनको आकर्षक गन्तव्य बनाउने उट्घोष गरेसंगै अब तनहुँ बासीको सपनाले आकार ग्रहण गर्ने आशा पलाएको छ ।

भौतिक संरचनको निर्माणले पर्यटन विकासमा कति महत्व राख्छ भन्ने कुरा त छिमेकी कास्कीको फेवातालमाथि डाँडामा निर्माण गरिएको विश्व शान्ति स्तुपाको निर्माण पछि आन्तरिक तथा वाह्य पर्यटकको बढ्दो चापलाई हेरे पुग्छ । पूर्व पश्चिम राजमार्गको नवलपरासीमा निर्माण गरिएको सास्वत धामले जसरी आन्तरिक पर्यटकलाई आकर्षित गरेको छ अनि हाम्रै पुलिमराङ्गमा निर्माण गरिएको सहिद स्मारक तथा छाब्दी बाराही मन्दिरमा निर्माण गरिएको मत्स्यकन्याको आकृति ति स्थानमा जसरी आन्तरिक पर्यटकको आगमन बढेको छ, त्यसलाई हेरेर सिक्न सकिन्छ । हामीले पनि बन्दीपुर, तनहुँसुर, ऋषिङ्ग, मानहुँकोट, देवघाट, ढोराबाराही, अकलादेबी लगाएतका विभिन्न स्थानमा विभिन्न भौतिक संरचना निर्माण गरेर आन्तरिक तथा बाह्य पर्यटकको आकर्षण बढाउन सकिन्छ । दमौलीमा महर्षी व्यासको १०८ फुट अग्लो मुर्ती बनाउन सक्दा र अन्य संरचना निर्माण गर्न सक्दा यो पक्कैपनि संसारभरका हिन्दु सभ्यताका अनुयायीहरुको आकर्षक गन्तव्य बन्न सक्छ । यसका लागि व्यास क्षेत्र शिवपाञ्चायन विकास कोषले गरेको थालनी प्रसंसा योग्य छ । तनहुँका लागि गौरवको आयोजना बन्न सक्ने यो कार्यमा सबैको अपनत्वव भाव जगाउन पनि सबैलाई धेरथोर लगानी गर्ने अवसर प्रदान गर्नु आवश्यक हुन्थ्यो र महायज्ञले सबैलाई यो अवसर प्रदान गरेको छ । सत्कार्यको थालनी गरेकामा विकास कोषलाई धन्यवादको पात्र छ, साथै महायज्ञको सफलताको कामना ।