कोरोना भाइरसले थपेको युवा भूमिका

कोरोना भाइरस चीनको बुहान प्रान्तमा पहिलो पटक देखा परेको भन्ने विषयमा हामी सबैलाई थाहा भएकै कुरा हो । हाच्छ्युँ गर्दा नाकबाट निस्कने स–साना सिँगानका छिटाहरुबाट संक्रमण हुने भनिएको कोरोना भाइरस वास्तवमै एतिबेला संसारको लागि चुनौति बनेर रहेको छ । मानव सभ्यताकै निम्ती चुनौतिको रुपमा देखापरेका यो भाइरसको संक्रमण हुना साथ मरिहालिन्छ भन्ने त होइन तर यसका कारण संसारका झण्डै साढे दुइ लाख भन्दा बढी मानिसले ज्यान गुमाइसकेका छन् ।
विश्वको सर्व शक्तिमान भनिएको हाम्रो सपनाको देश अमेरिकालाई यसले आच्छु आच्छु पारेको मात्र छैन सर्ब शक्तिमान राष्ट्रको ताज नै खोसिएला जस्तो भैसकेको छ । यस्तो बेला हाम्रो जस्तो अल्पविकसित राष्ट्रले भोग्नु पर्ने समस्या झन ठूलो हुनेछ । कोरोनाका कारण संसारका लाखौं युवाले रोजगारी गुमाउँदै छन् । रोजगारी गुम्दा उक्त युवाको परिवारमा पर्ने नकारात्मक असर बारे हामीलाई थाहैछ । उसका परिवारलाई सांझ विहान हात मुख जोर्न समस्या हुने मात्र होइन विरामी पर्दा राम्रो उपचार पाउने छैनन् भने उसका भाइ बहिनी वा छोरा छोरीले राम्रो शिक्षा दीक्षा पाउने छैनन् ।
तथ्याङ्ग भन्छ, नेपालका झण्डै ७० लाख युवा विदेशमा शिक्षा वा रोजगारीको क्रममा छन् । यो भनेको नेपालको कुल जनसंख्यको एक तिहाइ भन्दापनि बढी हो । शिक्षा आर्जनका लागि भनिएपनि अधिकांश युवाहरु रोजगारीका लागि नै विदेशमा रहेका यथार्थ हामीले बुझेकै छौं । र ति युवाहरु त्यहाँ रोजगारी खोसिएर नेपाल फर्कनु पर्ने अवस्था छ । यदि यसो भएमा वेरोजगारी समस्याले पिरोलिइरहेका हामीलाई थप पिरोलिनु पर्ने अवस्था आउँछ । खासगरी युवा पुस्ता यो कुराले बढी पिरोलिने छ । किनभने कमाउने उमेर समूहको उहि हो र उसको काँधका परिवारको लालनपालन, शिक्षा, स्वास्थ्य आदि सबैका जिम्मा छ ।
हामीलाई थाहा भएको अर्काे कुरा के पनि हो भने बेरोजगारीले अनेकौं समस्याहरु सृजना गर्दछ । यसका कारण गरिबी बढ्छ । गरिबी बढ्नुको परिणाम जनस्वास्थ्यमा नकारात्मक असर हुने त छँदैछ, उचित शिक्षा प्राप्त गर्ने अवसरबाट हामीले भविष्यका कर्णधार भन्ने गरेका बालबालिका वञ्चित हुनेछन् । समाजमा चोरी, लुटपाट जस्ता घटना बढ्न जाँदा शान्ति सुव्यवस्थामा खलल आउने छ । यी सबै कुराले देश र हाम्रो भविष्यलाई सदियौं पछाडि धकेल्ने छ भन्ने कुराले अहिले युवालाई सार्वाधिक सताएको हुनु पर्छ ।
कोरोना संक्रमण बढ्न नदिन देश यतिबेला बन्दाबन्दीमा छ । यतिबेला युवाको भूमिका महत्वपूर्ण हुन आउँछ । बन्दाबन्दीको पूर्ण पालनामा आफु प्रतिवद्ध रहेन र अरुलाई पनि प्रतिवद्ध रहने कुरामा सचेत गराउने काममा युवा नै सक्रिय हुन सक्छन् । यसले हाम्रो भविष्य सुरक्षित गर्न सघाउने छ । आम नेपाली युवालाई मेरो आग्रह छ, तपाईहरुको सक्रियताले देशलाई अहिलेको संकटबाट पार पाउन र हाम्रो भाविष्य सुरक्षित राख्न सहयोग पुग्नेछ । घरमै रहनु होला , सुरक्षित रहनु होला तर प्रविधिको पहुँचमा रहेका सबैले त्यसैको सहयोगमा चेतना बढाउने र संकटबाट पार पाउने कुरामा सहयोगी भूमिका निवार्ह गर्नुहोला । यसैमा हामी सबैको भलाई छ ।